MT News
Written by Thandar
Drama Horror ဇာတ်လမ်း “ချစ်ကြွေးဝိညာဉ်” The Soul Of Love ဇာတ်လမ်းတွဲမှာ အစေခံလို ဆက်ဆံခံရပြီး သီဟအောင်ဆိုတဲ့သူရဲ့ ရည်းစားဦး ခင်ခင်ခိုင်နေရာက ပါဝင်သရုပ်ဆောင်ထားပါတယ်လို့ သရုပ်ဆောင် နန်းဆုဦးက ပြောပါတယ်။
“ငယ်စဉ်ထဲက တခြားသူမိဘတွေ မွေးစားဖို့ခေါ်လာခံရတဲ့ ခင်ခင်ခိုင်နေရာက ပါဝင်သရုပ်ဆောင်ထားပါတယ်။ ဒီဇာတ်ကားမှာ ပရိသတ်မြင်နေကျ ဇာတ်လမ်းပုံစံမျိုးမဟုတ်ဘဲ ရသတစ်ခုတော့ ခံစားရမှာပါ။ ကိုယ့်က နေအိမ်တစ်ခုရဲ့မွေးစားသမီး အဖြစ်နေထိုင်ခဲ့ရတယ်။ အဲဒီအိမ်မှာ အစေခံလို ဆက်ဆံခံရပြီး သီဟအောင်ဆိုတဲ့သူရဲ့ ရည်းစားဦး ခင်ခင်ခိုင်နေရာက ပါဝင်သရုပ်ဆောင်ထားပါတယ်”လို့ သရုပ်ဆောင် နန်းဆုဦးကပြောပါတယ်။
စိန်ဌေးဗီဒီယိုထုတ်လုပ်ရေးက ထုတ်လုပ်မဲ့ ဒီကားရဲ့ ဇာတ်လမ်းနဲ့ ဇာတ်ညွှန်းကို နေထွဋ်နောင်က ရေးသားပြီး ဒါရိုက်တာ ကျော်နှင်းဆီက သရုပ်ဆောင်တွေဖြစ်တဲ့ ချမ်းမင်းရဲထွဋ် ၊ နန်းဆုဦး ၊ သင်ဇာမြင့်မိုရ် ၊ စိုးမိုးကြည် ၊ ဦးညီညီမင်း ၊ ညီဂျော် ၊ ကလေးသရုပ်ဆောင်တွေဖြစ်တဲ့ အားကိုးရာ ၊ မယ်မဒီ ၊ ပိုင်စိုး ၊ ကြည်စင်ဝင့်ကျော် ၊ ရွှေဝတ်မှုန်စံ ၊ ရှိုင်းဝဏ္ဏအောင် စတဲ့အနုပညာရှင်တွေနဲ့ ရိုက်ကူးထားတာ ဖြစ်ပါတယ်။
“ဒီဇာတ်လမ်းတွဲကတော့ မနှစ်ထဲက ရိုက်ထားတဲ့ အချစ်ဒရာမာ သဲထိတ်ရင်ဖိုကြိုက်တဲ့သူတွေအတွက် သဘောကျမယ့် ကားလေးပါ။ ရန်ကုန်မြို့က ချင်းချောင်းနန်းတော်နဲ့ မြောက်ဒဂုံဘက်မှာ ရိုက်ကူးထားတာပါ။ အခက်အခဲတွေကြားက Setting ပိုင်းတွေနဲ့ ရိုက်ကူးထားပါတယ်။ မြေအောက်ခန်းတွေ အရိုးခြောက် Setting တွေနဲ့ Animation ဖန်တီးထားလို့ ပရိသတ်ကြီး အားပေးကြပါဦးလို့ ပြောချင်ပါတယ်”လို့ ဒါရိုက်တာ ကျော်နှင်းဆီက ပြောပါတယ်။
တစ်ပိုင်းကို ၃၅ မိနစ်စာရှိပြီး အပိုင်း ၁၁ ပိုင်းပါဝင်တဲ့ ဒီဇာတ်လမ်းတွဲကို မနက်ဖြန် ဇွန်လ ၁၅ ရက်က စတင်ပြီး တနင်္လာနေ့ကနေ သောကြာနေ့အထိ ည ၈ နာရီမှာ Fortune TV ကနေ ထုတ်လွှင့် ပြသသွားမှာဖြစ်ပါတယ်။
