၁၅.၆.၂၀၂၃
Written By Thnadar
ဇာတ်လမ်း၊ ဇာတ်ညွှန်း၊ ဝတ္ထုတွေကို ရေးသားဖော်ညွှန်းတတ်သူ မြန်မာနိုင်ငံရုပ်ရှင်အစည်းအရုံး ဒုတိယ ဥက္ကဋ္ဌ ဦးအေးကြူလေးရဲ့ မြန်မာ့ရုပ်ရှင်သမိုင်းဝင်စာအုပ် ၄ အုပ်မြောက် “ရှုထောင့်စုံလင် မြန်မာ့ရုပ်ရှင်” စာအုပ်ထွက်ရှိနေတယ်လို့ သိရပါတယ်။
“ရုပ်ရှင်သမိုင်းနဲ့ ပတ်သက်ပြီး ဒီစာအုပ်က ၄ အုပ်မြောက် စာအုပ်ပါ။ သမိုင်းစာအုပ်ရေးဖြစ်တာက နောင်လာနောက်သားတွေအတွက် ရေးဖြစ်တာပါ။ ၁၉၂၀ အောက်တိုဘာ ၁၃ရက်က မြန်မာ့ရုပ်ရှင် “မေတ္တာနဲ့သူရာ” အချက်အလက်အတိအကျသိဖို့ ရှာမရခဲ့ဘူးဖြစ်ခဲ့တယ်။ လမ်းကမ်းစာစောင်က အချက်အလက် အတိအကျ သိခဲ့ရတယ်။ စာလေးတစ်ကြောင်းက လွယ်ပေမယ့် ဒီတစ်ကြောင်းကို ရှာတွေ့ဖို့ နှစ်တွေအကြာကြီးရှာခဲ့ရတာမို့ နောက်ဆုံးအမှန်ကိုရတာ။ စိတ်ဝင်တစား ရုပ်ရှင်သမိုင်းကို ပြုစုသူတွေရှားတဲ့အတွက် ဒီစာအုပ်ကို ထုတ်ဖြစ်တာပါ”လို့ ဦးအေးကြူလေးက MT News ကို ပြောပါတယ်။
“ရှုထောင့်စုံလင် မြန်မာ့ရုပ်ရှင်” စာအုပ်ကို အုပ်ရေ ၅၀၀ ထုတ်ဝေထားပြီး ဦးတင့်လွင်စိုးဇံ (နိုအဲရာစာပေတိုက်)က ကျပ် ၄၀၀၀ နဲ့ ဖြန့်ချိနေပါတယ်။ ရုပ်ရှင်သမိုင်းဝင် စာအုပ်အနေနဲ့ မြန်မာ့ရုပ်ရှင် ငွေရတု သမိုင်းဝင်များ၊ မြန်မာ့ရုပ်ရှင် ရွှေရတုသမိုင်းဝင်များနဲ့ မြန်မာ့ရုပ်ရှင် စိန်ရတုသမိုင်းဝင်များ စာအုပ်တွေကို ထွက်ရှိထားပြီးလည်း ဖြစ်ပါတယ်။
“သမိုင်းနဲ့ ပတ်သက်ပြီး ပြုစုရင်းက မြန်မာ့ရုပ်ရှင်အစည်းအရုံးအတွက် စာအုပ် ၂ အုပ်ပြုစုခဲ့ဖူးပါတယ်။ မြန်မာ့ရုပ်ရှင် သမိုင်းစဥ် ငွေရတုစာအုပ် ၊ မြန်မာ့ရုပ်ရှင် သမိုင်းစဥ် ရွှေရတုစာအုပ်တွေလည်း ကော်မတီဖွဲ့ ထုတ်ခဲ့ပါသေးတယ်။ ကိုယ်တိုင်ရေးတဲ့ ရုပ်ရှင်သမိုင်းနဲ့ ပတ်သက်ပြီး စာအုပ် ၄ အုပ်ထားတာပါ။ ဥပမာ – အသံထွက် ရုပ်ရှင်နဲ့ ပတ်သက်တာတွေ ဗြိတိသျှက ကိုယ့်နိုင်ငံထက် ပိုဦးဆောင်နေတယ်။ ဂျပန်ရင်သွေး ရိုက်တဲ့ အေဝမ်း ရိုက်တဲ့ခုနှစ်က ဘယ်လောက်ဆိုတာတွေ သိလာရမှာပါ။ သမိုင်းကြောင်း အတိအကျကို သိရမှာဖြစ်ပါတယ်”လို့ သူက ဆက်ပြောပါတယ်။
