MT News
Written by Nay Moe
NUG ၏ ကြားကာလ တရားသူကြီးအား ဗိုလ်နဂါး၏ MRDA ဖမ်းဆီးသွားသည်ဟု ပုလဲမြို့နယ်ပြည်သူ့အုပ်ချုပ်ရေးအဖွဲ့က ပြောသည်။
ဖြစ်စဥ်မှာ NUG ၏ ပုလဲမြို့နယ် ကြားကာလပြည်သူ့တရားစီရင်ရေးအဖွဲ့မှ တရားသူကြီးတဦးဖြစ်သည့် ကိုယ်ပိုင်အမှတ် တ-၁၂၃ ဦးပုဏ္ဏကကို မြန်မာ့တော်ဝင်နဂါးတပ်တော်(MRDA)တပ်ဖွဲ့ဝင်များက ဇွန်လ ၇ရက် မနက် ၈ နာရီခန့်တွင် လက်နက်များဖြင့် အကြမ်းဖက်ဖမ်းဆီးခေါ်ဆောင်သွားရာ မြို့နယ်ပြည်သူ့အုပ်ချုပ်ရေးအဖွဲ့မှ ပြန်လွှတ်ပေးရန်တောင်းဆိုသည့်အခါ ဇွန်လ ၈ ရက် မွန်းလွဲပိုင်းတွင် ဖမ်းဆီးထားသူကို မြို့နယ် ပအဖ၊ ပကဖ ထံ လွှဲပြောင်းပေးမည်ဟု MRDA တာဝန်ရှိသူက ကတိပြုခဲ့သော်လည်း ယခုအချိန်ထိ လွှဲပြောင်းပေးခြင်းမရှိသဖြင့် ဦးပုဏ္ဏက၏ လုံခြုံရေးနှင့် အသက်အန္တရာယ်ကို စိုးရိမ်နေရသည်ဟု ပုလဲမြို့နယ်ပြည်သူ့အုပ်ချုပ်ရေးအဖွဲ့က ပြောသည်။
NUG ၏ ဩဇာခံ PDF များ၊ ပကဖများနှင့် ဗိုလ်နဂါးကဲ့သို့ ဒေသန္တရကာကွယ်ရေးတပ်ဖွဲ့များ(LDF) များအကြား မကြာခဏတိုက်ခိုက်ဖမ်းဆီးမှုရှိသည့် ပုလဲ၊ ယင်းမာပင်၊ ဆားလင်းကြီးစသည့်ဒေသများတွင် လက်နက်ကိုင်အဖွဲ့များအကြား နယ်မြေလုဖမ်းဆီးမှုများ အပြန်အလှန်ပြုလုပ်နေကြသည်။ လက်ရှိတွင် ဖမ်းဆီးခံရသည့် ဦးပုဏ္ဏကသည် ပြည်သူများ၏ လျှပ်စစ်မီတာခများ အလွဲသုံးစားလုပ်ခြင်း၊ မူးယစ်ဆေးသုံးစွဲဖြန့်ဖြူးခြင်း စသည့်ကိစ္စများကြောင့် ဖမ်းဆီးခံရခြင်းဖြစ်သည်ဟုလည်း ကနဦးသတင်းများအရ သိရကာ ထိုဖြစ်စဉ်အား NUG၏ သက်ဆိုင်ရာအဖွဲ့အစည်းများထံ အကြောင်းကြား သတင်းပို့ထားပြီးဖြစ်သည်ဟုလည်း ပုလဲမြို့နယ်ပြည်သူ့အုပ်ချုပ်ရေးအဖွဲ့က ပြောသည်။
ပုလဲမြို့နယ် ပကဖခေါင်းဆောင်(အမတ်ဟောင်း) ကိုဇော်ထက်နှင့် ဗိုလ်နဂါးတို့သည် ပုဂ္ဂိုလ်ရေးတိုက်ခိုက်မှုများ အပြန်အလှန်ပြုလုပ်ခဲ့ကြဖူးသူများလည်းဖြစ်ပြီး လက်နက်ကိုင်အချင်းချင်းအကြား နယ်မြေလုကာ ဦးသူကတိုက်ခိုက်နေကြသော အဖွဲ့များလည်း ဖြစ်သည်။
