၇. ၆. ၂၀၂၃
Written By Thandar
ပရိသတ်တွေကို အများနဲ့မတူဘဲ အမြဲတမ်း အသစ်အဆန်းတွေပေးတတ်တဲ့ ဒါရိုက်တာ ညိုမင်းလွင်ရဲ့ “ရှမ်းကိုးမီး” ရုပ်ရှင်ဇာတ်ကားကြီးမှာ ဖဲကိုကျွမ်းကျင်စွာ ဆော့ကစားတတ်တဲ့ သရုပ်ဆောင်သစ်တွေ ခေါ် ယူနေတယ်လို့ MT News ကိုပြောပါတယ်။
“အဓိက,က ကျွန်တော်က တကယ်ဖဲရိုက်တတ်တဲ့သူတွေကို ရွေးချယ်ပြီးခေါ်ယူရတာက ဖဲရိုက်တာက အခုသင်၊ အခုရိုက်တတ်ကြတယ်။ ဒါပေမယ့် ဖဲထုပ်ကို ကိုင်တာကျတော့ တကယ်ရိုက်တတ်တဲ့သူနဲ့ မရိုက်တတ်တဲ့သူက အရမ်းကို သိသာတယ်။ အဲဒါကြောင့် တကယ်ဖဲရိုက်တတ်တဲ့သူမျိုးကို ခေါ်ယူတာပါ။ ဇာတ်ကားနာမည်က ရှမ်းကိုးမီး ဆိုတဲ့အတိုင်းပဲ ဖဲဝိုင်း ဇာတ်ဝင်ခန်းတွေပါမယ်။ အဲဒါကြောင့် တကယ်ဖဲရိုက်တတ်တဲ့သူတွေကို ခေါ်ယူတာပါ။ ဒီကားလေးကို ဇူလိုင်လမှာ စတင်ပြီးရိုက်ကူးဖြစ်မယ်။ သရုပ်ဆောင်ဟောင်းတွေလည်း ပါဝင်မှာပါ။ ဘယ်သူတွေပါဝင်မလဲဆိုတာကတော့ ပရိသတ်တွေ ထွက်ရှိလာရင် မြင်တွေ့ရမှာပါ။ လောလောဆယ်တော့ ပြောလို့မရသေးဘူး”လို ဒါရိုက်တာ ညိုမင်းလွင်က MT News ကို ပြောပါတယ်။
အဆိုပါ ရုပ်ရှင်ဇာတ်ကားအတွက် သရုပ်ဆောင်အလုပ်ကို အမှန်တကယ်ဝါသနာပါပြီး ဖဲကိုကျွမ်းကျင်စွာ ရိုက်တတ်သူ သရုပ်ဆောင်တွေကို လိုအပ်နေတာဖြစ်ပါတယ်။ ဖဲရိုက်တတ်ပြီး အနုပညာဝါသနာပါတဲ့သူ အသက် ၂၀ နှစ်ကနေ ၃၀ နှစ်ကြား အမျိုးသားသရုပ်ဆောင် လေးဦး၊ အမျိုးသမီးသရုပ်ဆောင်သုံးဦးကို ဇာတ်ကားမှာ ထည့်သွင်းရိုက်ကူးသွားမှာ ဖြစ်ပါတယ်။
Action Comedy ဇာတ်လမ်းပုံစံ “ရှမ်းကိုးမီး” ရုပ်ရှင်ဇာတ်ကားကို ဖဲဝိုင်းနဲ့ပတ်သက်ပြီး အလွန်အကျူး ရိုက်ကူးပြသမယ့် ရုပ်ရှင်ဇာတ်ကားမျိုးမဟုတ်တဲ့အတွက် ရုပ်ရှင်ဆင်ဆာပိုင်းမှာ စိုးရိမ်မှုများစွာ မရှိဘူးလိုလည်း သိရပါတယ်။
“ကျွန်တော်တို့က ဖဲဝိုင်းအကြောင်းနဲ့ ပတ်သက်ပြီးတော့ အလွန်အကျူး မပြသရင်ပြီးတာပါပဲ။ ကျွန်တော် သိသလောက်က ဆင်ဆာက Casino ကိုပဲ ဖြတ်တာပါ။ ဖဲဝိုင်းတော့ ရိုက်ကူးခွင့်ပေးထားပါတယ်။ ဒီဇာတ်ကားကို လာမယ့် ဇူလိုင်လဆန်းမှာ စတင်ပြီး တစ်လဝန်းကျင်လောက် ရိုက်ကူးပုံဖော်သွားမှာပါ ”လို့ သူက ဆက်ပြောပါတယ်။
ဇာတ်ကားအတွက် စိတ်ပါဝင်စားသူတွေအနေနဲ့ မျက်နှာပေါ်တဲ့ ဓာတ်ပုံ ၁ ပုံ၊ ကိုယ်လုံးပေါ်ပုံ ၁ ပုံ နဲ့အတူ ကိုယ်ရေးအကျဉ်းကို ပြည့်စုံစွာဖော်ပြပြီး ဇွန်လ ၂၀ နောက်ဆုံးထားကာ Viber ဖုန်း 095133145 , 09799828995 တွေကို ဆက်သွယ် လျှောက်ထားရမှာဖြစ်ပါတယ်။ သရုပ်ဆောင်သစ် ရွေးချယ်ခံရရင်လည်း ထိုက်သင့်တဲ့ အနုပညာကြေးကို ချီးမြှင့်ပေးသွားမယ်လို့ သိရပါတယ်။
