၂၉. ၅. ၂၀၂၃
Written By Thandar
FG SERIES PRODUCTION ရဲ့ အချစ်ဇာတ်လမ်းပုံစံ “အမုန်းရဲ့အလွန်” ရုပ်သံဇာတ်လမ်းတွဲ ကန်တော့ပွဲပေးပွဲကို မေလ ၂၉ ရက် နံနက် ၈နာရီခွဲက ရန်ကုန်မြို့ သင်္ဃန်းကျွန်းမြို့နယ်ရှိ ကျိုက္ကဆံဘုရားမှာ ကျင်းပခဲ့ပါတယ်။
“ဒီဇာတ်လမ်းတွဲမှာ နန်းနန်းရယ် ကိုကျော်ထက်ဇော်ရယ် ငုဝါတို့နဲ့ တခြား Talent တွေလည်း အများကြီးပါတယ်။ ငုဝါ ဒီကားမှာ ဗန့်ကာရိုက်တာအနေနဲ့ အလှုပ် သရုပ်ဆောင်ရမယ်။ ကိုယ့်ကြောင့် ပဋိပက္ခတွေဖြစ်လာမယ့် ပုံစံမျိုးလေးမှာ သရုပ်ဆောင်ထားပါတယ်။ ငုဝါက ရိုးရိုးပုံမှန်ကာရိုက်တာထက် ဗန့်ကာရိုက်တာကို ပိုကြိုက်တယ်။ ကိုယ့်ကို ဗန့်ကာရိုက်တာမှာ နေရာတစ်နေရာပေးတဲ့အတွက် အားသွန်ခွန်စိုက်အကောင်းဆုံး လုပ်ဆောင်သွားမှာပါ”လို့ သရုပ်ဆောင် ခိုင်သဇင်ငုဝါက ပြောပါတယ်။
ဒီဇာတ်ကားကို ဇာတ်ညွှန်း အေးကြည်သာဟန်၊ ဟိန်းဇော်ဦး ၊ ဟေမာစန်း ၊ ကျော်ရာဇာကို နဲ့ နိုင်ကိုကိုတို့က ရေးသားထားပြီး ဒါရိုက်တာထွန်းထက်အာကာဗိုလ်က သရုပ်ဆောင်တွေဖြစ်တဲ့ ကျော်ထက်ဇော် ၊ နန်းစန္ဒာလှထွန်း ၊ ဟိန်းရတု ၊ ခိုင်သဇင်ငုဝါ ၊ မိုက်မိုက် ၊ စိုင်းကောင်းမင်းထက် ၊ သက်ထက် ၊ မိုးမခမေ ၊ မေနန္ဒာ ကျော် ၊ မေသက်ကျော် ၊ ဆုထက်ထက်ကျော် ၊ ဖူးစုံ ၊ ဇင်မျိုး ၊ ရဲမွန် ၊ အေးသီတာ ၊ သူဇာပွင့် ၊ ရွှေလရောင်လင်း ၊ ဟိဏ်းသီရိစံနဲ့ အခြား အနုပညာရှင်များစွာနဲ့ ရိုက်ကူးသွားမှာဖြစ်ပါတယ်။
“ခုချိန်မှာလည်း ဗန့်နဲ့ ပတ်သက်ရင် ပြီးခဲ့တဲ့ အွန်စောကား The Glory ထဲမှာ အေးအေးဆေးဆေး ငြိမ်ငြိမ်လေးနဲ့ သူ့ကာရိုက်တာကို လုပ်သွားတယ်။ ဗန့်ဆိုပေမယ့် အရမ်းကြမ်းတမ်းတာတွေမပါဘူး။ အေးအေးဆေးဆေး ကာရိုက်တာပီပြင်အောင်လုပ်သွားတာကို သဘောကျတယ်။ ငုဝါဆို ခေတ်နှစ်ခုကို အခြေခံပြီး ရိုက်ရမှာမို့ ၂၀၀၀ ခုနှစ်က ဖက်ရှင်တွေလည်း ပြန်လေ့လာနေပါတယ်”လို့ သူမကဆက်ပြောပါတယ်။
၂၀၀၀ ပြည့်နှစ်နဲ့ လက်ရှိခေတ်နှစ်ခုကို အခြေခံတဲ့ “အမုန်းရဲ့အလွန်” ရုပ်သံဇာတ်လမ်းတွဲကို လာမယ့် ၂၀၂၄ ခုနှစ်မှာ MRTV-4 ရုပ်သံလိုင်းက ထုတ်လွှင့်သွားမှာ ဖြစ်တယ်လို့ သိရပါတယ်။
