၁၅. ၅. ၂၀၂၃
Written By Thandar
ထိုင်းနိုင်ငံကို ရောက်ရှိနေတဲ့ မော်ဒယ်သရုပ်ဆောင် ပိုင်တံခွန်က မွေထိုင်းနာမည်ကြီး လက်ဝှေ့ MC ဖြစ်တဲ့ Matthew နဲ့သွားရောက်တွေဆုံခဲ့တယ်လို့ သိရပါတယ်။
သူဟာ Matthew ရဲ့လက်ဝှေ့ကလပ်မှာ မွေထိုင်းသင်ယူနေတဲ့ ပုံရိပ်တွေလည်း တွေ့မြင်ရပါတယ်။ လာမယ့် မေလ ၁၉ ရက်နေ့ ည ၁၀ နာရီခွဲအချိန်မှာ Matthew ရဲ့ One Day With Matthew ရုပ်သံအစီအစဉ်မှာ ပိုင်တံခွန် ပါဝင်ဖို့အတွက် လေ့ကျင့်ရိုက်ကူးနေတာလည်း ဖြစ်ပါတယ်။
မကြာခင်ကလည်း ထိုင်းက မီဒီယာသမားတွေနဲ့ တွေ့ဆုံပြီး ယခင်အလုပ်ကြွေးတွေဖြစ်တဲ့ ဇာတ်ကား ၃ကားရိုက်ကူးဖို့လာခဲ့ကြောင်းနဲ့ အလုပ်သစ်တစ်ခုလက်ခံထားတဲ့အကြောင်းကို ဖြေဆိုခဲ့ပါသေးတယ်။ ပိုင်တံခွန်ရဲ့ ထိုင်းနိုင်ငံက အနုပညာလှုပ်ရှားမှုတွေနဲ့ ပတ်သက်ပြီးအင်တာဗျူးအစီအစဉ်ကိုတော့ MONO29 ရုပ်သံလိုင်းက ထုတ်လွှင့်မှုတွေ့လုပ်ဆောင်နေသလို အနုပညာလှုပ်ရှားအသစ်တွေကိုလည်း တင်ဆက်သွားမယ်လို့ သိရပါတယ်။
ထိုင်းနိုင်ငံနဲ့ ရုပ်ရှင်ဇာတ်ကားကို နိုဝင်ဘာလမှာ ရိုက်ကူးသွားမှာဖြစ်ပြီး ဇာတ်ဝင်ခန်းတွေမှာ ထိုင်းဘာသာစကားနဲ့ အင်္ဂလိပ်ဘာသာစကားကို အများဆုံးပြောသွားမယ်လို့ သိရပါတယ်။ ရိုက်ကူးရေးအပိုင်း အတိအကျ သိရရင် ပရိသတ်ကို အသိပေးသွားမယ်လို့ သိရပါတယ်။ ပိုင်တံခွန်ကတော့ ထိုင်းနိုင်ငံက အလုပ်ကြွေးတွေကို လုပ်ကိုင်ရင်းနဲ့ ပတ္တရားကို သွားရောက်လည်ပတ်မှာဖြစ်ပြီး ၆ ရက် ခရီးကြာမယ်လို့ သိရပါတယ်။
ဒါ့အပြင် လာမယ့် ၁၈ ရက်မှာ ကမ္ဘောဒီးယားကို ရုပ်ရှင်သွားရိုက်ဖို့ရှိသလို တရုတ် ရုပ်ရှင်ထုတ်လုပ်ရေးနဲ့ လာမယ့် စက်တင်ဘာလမှာ ဇာတ်ကားရိုက်ကူးဖို့ လက်မှတ်ရေးထိုးမယ်လို့လည်း သိရပါတယ်။
