၁၂. ၅. ၂၀၂၃
Written By Thandar
ပရိသတ်စိတ်ဝင်စားမှု အရမ်းမြင့်တက်နေတဲ့ “အိမ်ထောင်” ဇာတ်လမ်းတွဲမှာ ဒေါက်တာမြဒေဝီကျော်နေရာက ပီပြင်စွာ သရုပ်ဆောင်ထားတဲ့ သရုပ်ဆောင်ချောရတနာကတော့ သေသူကပြန်ရှင်လာပြီး အံ့ထူးထက်ကို ကုတ်ချိုးပေးဖို့ ပရိသတ်တွေက တောင်းဆိုနေကြတယ်လို့ ဆိုပါတယ်။
“မြဒေဝီကျော် ပြန်ရှင်လာပြီး အံ့ထူးထက်ကို ကုတ်ချိုးပေးဖို့ ပရိသတ်တွေက တောင်းဆိုနေကြတယ်။ ချောဆိုရင် အရမ်းစိတ်ဆင်းရဲတယ်။ စိတ်ညစ်လာရင် တစ်ရက်တောင်မခံဘူး။ တစ်ရက်ပဲအပြည့်အဝ ငိုလိုက်တယ်။ နောက်ရက်ဆိုရင် အဲဒီလိုမျိုးတွေမရှိတော့ဘူး မေ့သွားပြီ။ အိမ်တောင်ရှင်အမျိုးသမီးတွေက သားသမီးအပူပေါ့ ။ ချောကတော့ ယောက်ျားအပူထက် သားသမီးအပူက ပိုများတယ်။ အဲဒီဟာတွေ နောက်နေ့ နောက်နေ့ အတွက် တွေးမနေတော့ဘူး။ အရမ်းတွေးရင် အရမ်းကို ပူလောင်ရတယ်။ ဒီအတွက် ဒီနေ့ဒီနေ့မှာပဲ အကောင်းဆုံး ဖြစ်အောင်တော့ ကျော်လွှားနေထိုင်တယ်”လို့ သရုပ်ဆောင် ချောရတနာက ပြောပါတယ်။
လက်ရှိ Mahar App ကနေ ထုတ်လွှင့်နေတဲ့ “အိမ်ထောင်” ဇာတ်လမ်းတွဲရဲ့ ဇာတ်ဝင်ခန်းထဲအတိုင်း မိသားစုပုံစံ NETA EV Car Launching party မိတ်ဆက် ပွဲတက်လာကြတဲ့ ကျော်ထက်အောင်၊ ချောရတနာနဲ့ ဗညားဘုန်းပြည့်တို့က ပရိသတ်ကို ပြောပြလာတာလည်းဖြစ်ပါတယ်။
“အစကတော့ ဖြစ်ရပ်မှန်ရှိတယ်လို့ နည်းနည်းပဲသိတာပါ။ ချော သေချာ ဂဃနဏတော့မသိဘူး။ ချောရဲ့ အလုပ်ကိုပဲ အကောင်းဆုံးဖြစ်အောင်လုပ်ခဲ့တယ်”လို့ သူမကဆက်ပြောပါတယ်။
