၁၁. ၅. ၂၀၂၃
Written By Thandar
လက်ရှိထုတ်လွှင့်ပြသနေတဲ့ ၅၂၈ နဲ့ ၁၅၀၀ ချစ်ခြင်းမေတ္တာကို ဖော်ကျူးပြသထားတဲ့ “ဒွိဟ” ဇာတ်ကားမှာ နှင်းမြကာရိုက်တာနဲ့ ပရိသတ်မြင်တွေ့ရမှာပါလို့ သရုပ်ဆောင် ယမင်းရွှေစင်က MT News ကို ပြောပါတယ်။
“ဒီဇာတ်ကားက မိဘနဲ့သားသမီးကြား၊ ချစ်သူနှစ်ဦးကြားက ၅၂၈ နဲ့ ၁၅၀၀ ချစ်ခြင်းမေတ္တာကို ဖော်ကျူးပြသထားတဲ့ကားကောင်းလေးပါ။ ဟန်နီကို ဒီဇာတ်ကားမှာ နှင်းမြဆိုတဲ့ ကာရိုက်တာနဲ့ ပရိသတ်မြင်တွေ့ရမှာပါ။ ဟန်နီက အရင်က Music Video ရိုက်ဖြစ်ပေမယ့် ဒီဇာတ်ကားကတော့ ပထမဆုံး ပါဝင်သရုပ်ဆောင်ထားတဲ့ ဇာတ်ကားလေးလည်းဖြစ်ပါတယ်။ ဒီကားထဲမှာ မပြည့်စုံတဲ့ ချစ်သူကောင်လေးကို ချစ်ပေမဲ့လည်း သူ့ရဲ့အသိုင်းအဝိုင်းထဲ မဝင်နိုင်တာကြောင့် ချစ်သူကောင်လေးကို သူမရဲ့ချမ်းသာတဲ့ အသိုင်းဝိုင်းထဲ ဆွဲထည့်ဖို့ ကြိုးစားရင်း ဘာတွေဖြစ်သွားခဲ့လဲဆိုတာ ပရိသတ်တွေ့မြင်ရမှာဖြစ်ပါတယ်”လို့ သရုပ်ဆောင် ယမင်းရွှေစင်က ပြောပါတယ်။
ဒီဇာတ်ကားကို ဇာတ်လမ်း၊ ဇာတ်ညွှန်းအပြင် ဒါရိုက်တာပိုင်းကို သားကျော်မောင်နဲ့ တွဲဖက်ဒါရိုက်တာ ဒံကြီးတို့က သရုပ်ဆောင်တွေဖြစ်တဲ့ နေထက်နိုင်၊ ယမင်းရွှေစင်၊ ဒေါ်ရတနာခိုင်၊ မင်းဇော်လေး၊ ရန်လင်းအောင်၊ တင့်နိုင် ဝင်း၊ ထက်နိုင်ဦး၊ အောင်ကျော်မိုး၊ ကိုသက်၊ အောင်ဇေယျ စတဲ့သူတွေနဲ့ ရိုက်ကူးထားပြီး လက်ရှိမှာ ဒွိဟ ဇာတ်ကားကို kyal ta gon YouTube Channel က ထုတ်လွှင့်ပြသပေးနေလျှက်ရှိပါတယ်။
“ပထမဆုံးဇာတ်ကားဆိုပေမဲ့လည်း ဝါသနာရှေ့ထားလို့ ဟန်နီအများကြီးကြိုးစားထားပါတယ်။ ဒါရိုက်တာကလည်း ချီးကျူးလို့ ဝမ်းသာမိပါတယ်။ ဟန်နီ့ရဲ့ လိုအပ်ချက်အနည်းငယ်ရှိရင်လည်း ပရိသတ်တွေ နားလည်ပေးပြီး ဝေဖန်ထောက်ပြပေးပါဦးနော်။ အခွင့်အခါရရင် ရသလို မခိုမကပ် အမြဲကြိုးစားသွားပါ့မယ်”လို့ သူမက ဆက်ပြောပါတယ်။
