၁၀. ၅. ၂၀၂၃
Written by Min Mahar
ငါန်းဇွန်မြို့နယ်၊ ငါန်းဇွန်-ငါန်းမြာသွားကားလမ်းပေါ်ရှိ ငါန်းလွှန့်ကျေးရွာအဝင်ဆိုင်းဘုတ်အနီးတွင် သေနတ်ဒဏ်ရာများဖြင့် သေဆုံးနေသော အမည်မသိအမျိုးသားအလောင်း ၂ လောင်းအား ယနေ့မနက်ပိုင်းက တွေ့ရှိခဲ့ကြောင်း ဒေသခံများထံမှ သိရသည်။
ဖြစ်စဉ်မှာ ယနေ့ မေလ ၁၀ ရက် နံနက် ၇ နာရီ ၂၀ မိနစ်ခန့်က မန္တလေးတိုင်းဒေသကြီး၊ ငါန်းဇွန်မြို့နယ်၊ ငါန်းလွှန့်ကျေးရွာအုပ်စု၊ ငါန်းလွှန့်ကျေးရွာအနီးရှိ ငါန်းဇွန်-ငါန်းမြာသွား ကားလမ်းပေါ်၏ ငါန်းလွှန့်ကျေးရွာအဝင်ဆိုင်းဘုတ်နားတွင် အမည်မသိအမျိုးသား ၂ ဦးသေဆုံးနေသည်ကို ရွာခံများကတွေ့ရှိခဲ့သဖြင့် သက်ဆိုင်ရာသို့ အကြောင်းကြားခဲ့ကာ သက်ဆိုင်ရာလုံခြုံရေးတပ်ဖွဲ့ဝင်များမှ ရောက်ရှိလာပြီး စုံစမ်းစစ်ဆေးမှုများပြုလုပ်ခဲ့ရာတွင် သေနတ်ဒဏ်ရာများဖြင့် သေဆုံးနေသောကြောင့် မနက် ၈ နာရီ ၁၅ မိနစ်ခန့်တွင် ဒေသခံလူမှုကူညီရေးယာဉ်ဖြင့် ငါန်းဇွန်မြို့နယ် ပြည်သူ့ဆေးရုံသို့ ပို့ဆောင်ထားရှိခဲ့ကြောင်း သိရသည်။
အဆိုပါသေဆုံးသွားသောရုပ်အလောင်းများအား အနီးဝန်းကျင်ရှိရွာများသို့ သက်ဆိုင်ရာအဖွဲ့များမှ လိုက်လံစုံစမ်းခဲ့ရာ၌ အမည်/နေရပ်လိပ်စာအား ယခုချိန်ထိ မသိရှိသေးကြောင်း လုံခြုံရေးတပ်ဖွဲ့နှင့်နီးစပ်သူထံမှ သိရသည်။ ထို့အတွက် သေဆုံးသွားသူများအား သေမှုသေခင်းဖွင့်လှစ်ထားကြောင်းလည်း ငါန်းဇွန်မြို့မရဲစခန်းမှ သိရသည်။
