သေဒဏ်ကျခံနေရသူ ၃၈ ဦးကို ထောင်ဒဏ် တစ်သက်တစ်ကျွန်းပြစ်ဒဏ်သို့ ပြောင်းလဲ သက်ညှာ

MT News
၃. ၅. ၂၀၂၃

အကျဥ်းထောင်အသီးသီးတွင် သေဒဏ်ကျခံနေရသူ ၃၈ ဦးကို ထောင်ဒဏ်တစ်သက်တစ်ကျွန်းပြစ်ဒဏ်များသို့ ပြောင်းလဲလိုက်ပြီး သက်ညှာခွင့်ပြုခဲ့ကြောင်း သတင်းရရှိသည်။

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌသည် မြန်မာသက္ကရာဇ် ၁၃၈၅ ခုနှစ်၊ ကဆုန်လပြည့်နေ့တွင် ကျရောက်သည့် ကဆုန်လပြည့်ဗုဒ္ဓနေ့ အထိမ်းအမှတ်အားဖြင့် အကျဉ်းထောင်အသီးသီးတွင် သေဒဏ်ချမှတ်ခြင်းခံထားရသော အကျဉ်းသား/သူ (၃၈) ဦးကို ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေ ပုဒ်မ ၂၀၄၊ ပုဒ်မခွဲ (က) အရ ချမှတ်ထားသည့် သေဒဏ်ပြစ်ဒဏ်မှ လွတ်ငြိမ်း ခွင့်ပြု၍ ထောင်ဒဏ်တစ်သက်သို့ ပြောင်းလဲကျခံစေလိုက်သည်ဟု ကြေညာချက်တွင် ဖော်ပြထားသည်။

SAC ဥက္ကဋ္ဌသည် ယနေ့ကျရောက်သော ကဆုန်လပြည့်ဗုဒ္ဓနေ့အထိမ်းအမှတ်အဖြစ် နိုင်ငံရေးပုဒ်မဟုခေါ်ဆိုသော ပုဒ်မ ၅၀၅(က)ဖြင့် ထောင်ဒဏ်ကျခံနေရသူ ၂၁၃၅ ဦးကိုလည်း ပြစ်ဒဏ်လွတ်ငြိမ်းခွင့်ပြုခဲ့သည်။