MT News
Written By Thandar
ပရိသတ်အားပေးတော်တော်လေးရခဲ့တဲ့ “လက်သည်” ရုပ်ရှင်ဇာတ်ကားမှာ ယောင်္ကျား ဖြစ်သူ မြင့်မြတ်ကို သဝန်တိုပြီး နိုင်စားတဲ့ မိန်းမတစ်ယောက်နေရာက သရုပ်ဆောင်ခဲ့တယ်လို့ သရုပ်ဆောင်မေမြင့်မိုရ်က ပြောပါတယ်။
“ကိုမြင့်မြတ်ကတော့ ဟာသပိုင်းရော ဒရာမာပိုင်းပါ ပိုင်နိုင်တဲ့ အနုပညာရှင်တစ်ယောက်လည်း ဖြစ်ပါတယ်။ အကိုက ဇာတ်ဝင်ခန်းတစ်ခုကို လုပ်တော့မယ်ဆိုရင် တကယ်မရိုက်ခင်မှာ rehearsal ခဏခဏလုပ်တယ်။ ပြီးတော့မှ ရိုက်တာဆိုတော့ အဆင်ပြေတယ် အခက်အခဲတော့မရှိပါဘူး၊ ပြင်ဦးလွင်မှာ ရိုက်တုန်းကတော့ အမှတ်တရတွေအများကြီးပေါ့။ ပုံစံကတော့ ယောင်္ကျားကို နိုင်ပြီး စိတ်ဆိုးတတ်တဲ့ပုံစံကို သရုပ်ဆောင်ထားတာပါ။ ယောင်္ကျားကို သဝန်တိုပြီး နိုင်စားတဲ့ မိန်းမတစ်ယောက်အနေနဲ့ သရုပ်ဆောင်ထားပါတယ်”လို့ သရုပ်ဆောင်မေမြင့်မိုရ် ကပြောပါတယ်။
သူမက သရုပ်ဆောင် ခြူးလေး ၊ အကယ်ဒမီ မြင့်မြတ် တို့နဲ့အတူသရုပ်ဆောင်ခဲ့တဲ့ ချစ်စရာကောင်းတဲ့ ဟာသကား လေးလည်းဖြစ်တဲ့ လက်သည် ရုပ်ရှင်ဇာတ်ကားမှာ ပရိသတ်အားပေးမူရရှိခဲ့ပြီး ဇာတ်ကားဝင်ငွေလည်း အတော်လေးရခဲ့တယ်လို့ သိရပါတယ်။
“မေလေးက ဒရာမာရိုက်တာများတယ်ဆိုတော့ ခုလို ဟာသကားလေး ရိုက်တော့လည်း အတွေ့အကြုံတွေ ရပါတယ်။ ပျော်ဖို့လည်း ကောင်းပါတယ်။ ကလေး အမေ နေရာလည်း မေလေးက သရုပ်ဆောင်ရမှာပဲလေ ။ လင်မယား ကာရိုက်တာနဲ့ သရုပ်ဆောင်ရမှာပေါ့ အခက်အခဲတွေတော့ မရှိပါဘူး”လို့ သူမကဆက်ပြောပါတယ်။
လက်ရှိမှာလည်း မေမြင့်မိုရ် ၊ အကယ်ဒမီ ကျော်ရဲအောင် ၊ အဆိုတော်သရုပ် ဆောင်တွေဖြစ်တဲ့ ရဲရင့်အောင်နဲ့ နေဝင်းတို့နဲ့အတူ ပါဝင်သရုပ်ဆောင်ထားတဲ့ ရည်ရွယ်မိုး ရုပ်ရှင်ဇာတ်ကား ကိုလည်း ရုံတင်ပြသရာ ပရိသတ် အားပေးမှု ရရှိလျက်ရှိပါတယ်။
