“မွေးနေ့ရောက်တိုင်း အသက်တစ်နှစ် ကြီးလာပြီ ဒီထက်ရင့်ကျက်ဖို့လိုတယ် ကြိုးစားဖို့လိုတယ်ဆိုတဲ့ စိတ်လေးဖြစ်မိတယ်ဆိုတဲ့ မြယာ”
၂၂. ၄. ၂၀၂၃
Written By Thandar
The Teacher ရုပ်ရှင်ကားကတစ်ဆင့် ပရိသတ်အားပေးမှုရလာတဲ့ သရုပ်ဆောင် မြယာရဲ့ ဒီနေ့ကျ ရောက်တဲ့ အသက် ၂၀ ပြည့် မွေးနေ့အလှူတော်မင်္ဂလာကို ဧပြီ ၂၂ ရက် နံနက်ပိုင်းက ရန်ကုန်မြို့ သာကေတမြို့နယ် (၇)အနောက်ရပ်ကွက်ရှိ ဓမ္မဝိသောဓနိ ပရိယတ္တိစာသင်တိုက်မှာ ကျင်းပခဲ့ပါတယ်။
” မြယာရဲ့ ဘိုးဘိုး၊ ဘွားဘွားကို ရည်စူးပြီး အလှူလေးလုပ်ဖြစ်တဲ့သဘောပါ။ မွေးနေ့တိုင်းကို စားပွဲသောက်ပွဲတွေထက် နှစ်တိုင်း အဘိုးအဘွားတွေကို ရည်စူးပြီး အလှူလေးလုပ်ဖြစ်တယ်။ ကုသိုလ်ကောင်းမှုလေးတွေ လုပ်ပြီးပဲ ဖြတ်သန်းဖြစ်တာများတယ်။ မြယာအတွက်က မွေးနေ့ရောက်တိုင်း အသက်တစ်နှစ်ကြီးလာပြီ ဒီထက် ရင့်ကျက်ဖို့လိုတယ်။ ကြိုးစားဖို့လိုတယ်ဆိုတဲ့ စိတ်လေးဖြစ်မိတယ်”လို့ သရုပ်ဆောင် မြယာက ပြောပါတယ်။
သူမက အနန္တော၊ အနန္တငါးပါးဦးထိပ်ထားပြီး နှစ်ဖက်သောဖိုးဖိုးဖွားဖွားတွေကို ရည်စူးကာ ဓမ္မဝိသောဓနိပရိယတ္တိစာသင်တိုက်ရှိ သံဃာတော်အရှင်သူမြတ်တွေကို နေ့ဆွမ်း ဆက်ကပ်လှူဒါန်းခဲ့ပါတယ်။ ဒါ့အပြင် မြယာက မွေးနေ့အလှူအဖြစ်အနေနဲ့ မြန်မာနိုင်ငံ ရုပ်ရှင်အစည်းအရုံးမှာလည်း အလှူငွေ ၁ သိန်းကျပ်ကို လှူဒါန်းခဲ့ပါတယ်။
သရုပ်ဆောင်မြယာဟာ ၂၀၂၀ ကတည်းက အနုပညာလောကထဲသို့ ရောက်ရှိလာသူဖြစ်ပြီး မကြာသေးမီက ရုံတင်ပြသခဲ့တဲ့ The Teacher ရုပ်ရှင်ဇာတ်ကားရဲ့ ခေါင်းဆောင် မင်းသမီးတစ်ဦးအနေနဲ့ ရပ်တည်အောင်မြင်ခဲ့သူလည်းဖြစ်ပါတယ်။
