သုံးနှစ်စာချီးမြှင့်မည့် မြန်မာ့ရုပ်ရှင်အကယ်ဒမီပေးပွဲကို မေလ ၆ ရက်တွင် နေပြည်တော် မြို့တော်ခန်းမအနီးရှိ လဟာပြင်ကဇာတ်ရုံ၌ ပြုလုပ်မည်

၁၉. ၄. ၂၀၂၃
Written By Thandar

သုံးနှစ်စာအတွက် ချီးမြှင့်ပေးအပ်မည့် မြန်မာ့ရုပ်ရှင်ထူးချွန်ဆု အကယ်ဒမီပေးပွဲကို လာမည့် မေလ ၆ ရက်နေ့တွင် နေပြည်တော် မြို့တော်ခန်းမအနီးရှိ လဟာပြင်ကဇာတ်ရုံ၌ ခမ်းနားထည်ဝါစွာ ကျင်းပမည်ဟု သိရသည်။

အကယ်ဒမီထူးချွန်ဆုပေးပွဲ ကျင်းပနိုင်ဖို့အတွက် ကြိုတင်ပြင်ဆင်ဆောင်ရွက်နေမှုများကို ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်း၊ ဒုတိယဝန်ကြီး ဦးရဲတင့်၊ အမြဲတမ်းအတွင်းဝန် ဦးမျိုးမြင့်မောင်နှင့် တာဝန်ရှိသူများက ဧပြီ ၁၈ ရက်ညနေပိုင်းတွင် သွားရောက်ကြည့်ရှုခဲ့သည်ဟု သိရသည်။

အဆိုပါ အခမ်းအနားတွင် နိုင်ငံတော် သံစုံတီးဝိုင်းနှင့် မြန်မာ့ဆိုင်းဝိုင်း နေရာချထားမှု၊ အခမ်းအနားတွင် ဖျော်ဖြေမည့် တေးသီချင်းများရွေးချယ်မှု၊ အခမ်းအနားမှူးများနှင့် နေရာချထားမှု ၊ ဖိတ်ကြားမည့် ဧည့်သည်တော် အစီအစဉ်၊ ကြိုဆိုဧည့်ခံရေး ဆောင်ရွက်ထားရှိမှု၊ တည်းခိုနေရာချထားသည့် အစီအစဥ် စသည်များကို ဆွေးနွေးခဲ့သည်ဟုလည်း သိရှိရသည်။

၂၀၁၉၊ ၂၀၂၀ နှင့် ၂၀၂၂ ခုနှစ်များအတွက် မြန်မာ့ရုပ်ရှင်ထူးချွန်ဆု ချီးမြှင့်ပွဲအခမ်းအနား ရွှေစင်ရုပ်တုအားလုံးနှင့် ကုန်ကျစရိတ်ကို နိုင်ငံတော်က မ,တည်ကျခံသွားမည်ဖြစ်သည်။