၁၁. ၄. ၂၀၂၃
Written By Thandar
လေးပွင့်ဆိုင် အချစ်ဇာတ်လမ်း “ရည်ရွယ်မိုး”ရုပ်ရှင်ဇာတ်ကား အထူးပွဲ ပြသမိတ်ဆက်ပွဲကို ဧပြီ ၁၀ ရက် ညနေပိုင်းက ရန်ကုန်မြို့ သမ္မတရုပ်ရှင်ရုံမှာ စည်ကားသိုက်မြိုက်စွာကျင်းပခဲ့ပါတယ်။
“ကျွန်တော့်ရဲ့ ပထမဦးဆုံး ဖန်တီးခဲ့တဲ့ ရုပ်ရှင်ကားမှာပါ။ ပုံမှန်ကားတွေထက် ခွဲထွက်နေတဲ့ဇာတ်ကားလို့ ပြောလို့ရပါတယ်။ အချစ်ကားကိုမှ ခပ်ကြမ်းကြမ်းအချစ်ကားလေးပါ။ ဇာတ်ညွှန်းပိုင်းလည်း ကျွန်တော် ၁၀၀ ရာခိုင်နှုန်း ပုံဖော်နိုင်ခဲ့ပါတယ်။ ဒီကားက လေးပွင့်ဆိုင်ဇာတ်လမ်းပါ။ အဓိက ကိုနိုင်ကြီး(ခ)ကျော်ရဲအောင်ရယ်၊ နေဝင်းရယ်၊ ရဲရင့်အောင်တို့က ဒီကောင်မလေးအတွက် အချစ်တွေလှုပ်ခတ်တဲ့ ပုံစံမျိုးလေးပါ။အချစ်ကြီးလို့ အမျက်ကြီးကြတဲ့သဘောလေးတွေလည်း ပါပါတယ်”လို့ ဒါရိုက်တာ စိုးမိုးမင်းက MT News ကို ပြောပါတယ်။
Bo Bo Film ထုတ်လုပ်ရေးက ထုတ်လုပ်ပြီး ဇာတ်လမ်း၊ ဇာတ်ညွှန်းကို ဒီထက်အောင်က ရေးသားပြီး ဒါရိုက်တာစိုးမိုးမင်းက သရုပ်ဆောင်တွေဖြစ်တဲ့ အကယ်ဒမီ ကျော်ရဲအောင်၊ အဆိုတော် ရဲရင့်အောင်၊ Snare အဖွဲ့ဝင် အဆိုတော် နေဝင်း၊ မေမြင့်မိုရ်၊ မင်းအာကာ၊ ခွန်းည၊ ချိုမဒီသွင် စတဲ့ အနုပညာရှင်တွေနဲ့ ရိုက်ကူးထားပါတယ်။
“ရည်ရွယ်မိုး” ရုပ်ရှင်ဇာတ်ကားကို လာမယ့် မြန်မာနှစ်ဆန်း ၁ ရက်နေ့ဖြစ်တဲ့ ဧပြီ ၁၇ ရက်နေ့မှာ မြန်မာတစ်ပြည်လုံး ရုံတင်ပြသသွားမှာ ဖြစ်ပါတယ်။
“ကျွန်တော်အရင် ရိုက်ကူးမှုတွေလုပ်ခဲ့ပေမယ့် ရုပ်ရှင်ကားကြီးမို့ စိန်ခေါ်မူတွေက အများကြီးပေါ့။ ရည်ရွယ်မိုးက နေဝင်းကိုလည်း သရုပ်ဆောင်ကောင်းတစ်ယောက်အဖြစ်နဲ့ ဖော်ထုတ်ပေးနိုင်မယ်ဆိုတာ သေချာသလောက်ပါပဲ။ ကျွန်တော် ပထမဦးဆုံးရိုက်ကူးဖန်တီးထားတဲ့ ကားလေးကို ပရိသတ်တွေလည်း အားပေးပါဦးလို့ ပြောချင်ပါတယ်။ နှစ်ဆန်း ၁ ရက်မှာ ရုံတင်မှာမို့ လာအားပေးကြပါလို့ ပြောချင်ပါတယ်”လို့ သူကဆက်ပြောပါတယ်။
