၃. ၄. ၂၀၂၃
Written By Thandar
ရုပ်သံဇာတ်လမ်းတချို့ကြောင့် ပရိသတ်အားပေးမှုတွေရရှိလာတဲ့ သရုပ်ဆောင် သင်ဇာက“နွေဥသြ” ဇာတ်လမ်းတွဲမှာ အဆိုပိုင်းကို အဓိက အရမ်းရူးသွပ်တဲ့ ခါနွေနေရာက သရုပ်ဆောင်ထားတယ်လို့ ဆိုပါတယ်။
“သူငယ်ချင်း ၄ယောက်ရှိကြတယ်။ ငယ်ငယ်လေးထဲက ကြီးတဲ့အထိလည်း ချစ်ကြတယ်။ သင်ဇာက အရမ်းကို အဆိုတော်ဖြစ်ချင်တယ်။ အဆိုပိုင်းကို အဓိက အရမ်းရူးသွပ်တဲ့ ခါနွေနေရာက သရုပ်ဆောင်ထားပါတယ်။ ပေါ့ပေါ့ပါးပါးလေးနဲ့ ဘာလုပ်လုပ် ပြောင်ချော်ချော်ကောင်မလေး ကာရိုက်တာမျိုးလေးနဲ့ သရုပ်ဆောင်ထားတယ်။ သင်္ကြန်ဇာတ်လမ်း ပုံစံလေးဆိုတော့ ချစ်ဖို့လည်းကောင်းတယ်။ ယွန်းယွန်းတို့နဲ့ ရိုက်ကူးရတဲ့အတွက်လည်း သင်ဇာအတွက် အနုပညာ ပညာတွေလည်း ရပါတယ်”လို့ သရုပ်ဆောင် သင်ဇာက ပြောပါတယ်။
တန်ခူး၊ ဥဩဆိုတဲ့ ကောင်လေးနှစ်ယောက်နဲ့ သမု၊ ခါနွေ၊ ကာရံ၊ ကြွယ်ဆိုတဲ့ သူငယ်ချင်းလေးယောက်တို့ April Fools လုပ်ရင်းက ထင်မှတ်မထားတဲ့ ချစ်စဖွယ်အလွဲလေးတွေနဲ့ ပျော်စရာ သင်္ကြန်အချိန်အခါကို အချစ်ရှာပုံတော်ဖွင့်လို့ ဖြတ်သန်းဖို့ဖြစ်လာတဲ့အကြောင်းလေးကို ဒါရိုက်တာ ကြည်က ပုံဖော်ထားတာဖြစ်ပါတယ်။
နွေဥသြ ဇာတ်လမ်းတွဲမှာ ယနေ့ ဧပြီ ၃ ရက် ညပိုင်း ၉ နာရီမှာ တနင်္လာနေ့ကနေ သောကြာနေ့အထိ Channel K ရုပ်သံလိုင်းကနေ ထုတ်လွှင့်မှာဖြစ်ပါတယ်။ ဒီဇာတ်လမ်းတွဲမှာ သရုပ်ဆောင်အနေနဲ့ သျှင်းမြတ်၊ ရဲရင့် မြတ်သူ၊ အကယ်ဒမီယွန်းယွန်း၊ ဆုထက်၊ သင်ဇာ၊ လားဒင့်ထားရီ ၊ အေးသီတာနဲ့ သရုပ်ဆောင်များစွာ ပါဝင်ထားကြတာလည်း ဖြစ်ပါတယ်။
