ယူကရိန်းနိုင်ငံ အရှေ့ပိုင်းရှိ ဘက်မတ်မြို့အား ရုရှားတပ်ဖွဲ့များက သိမ်းပိုက်ဟု ပြောကြား

၃. ၄. ၂၀၂၃
Translated by Htwe Ko Tun

ရုရှားတပ်ဖွဲ့များက Artyomovsk မြို့ဟုခေါ်ဝေါ်ကြပြီး ယူကရိန်းနိုင်ငံအတွင်းတွင်မူ ဘက်မတ်(Bakhmut)မြို့ဟု သိကြသော ယူကရိန်းနိုင်ငံ အရှေ့ပိုင်းရှိမြို့ကို သိမ်းပိုက်လိုက်နိုင်ပြီဖြစ်ကြောင်းနှင့် ဘက်မတ်မြို့၏ မြို့တော်ခန်းမတွင် ရုရှားအလံကို လွှင့်ထူလိုက်နိုင်ပြီဖြစ်ကြောင်း ရုရှားအပျော်တန်းလက်ရုံးတပ်ဖွဲ့ဖြစ်သော Wagner Group ကိုတည်ထောင်သူ ရက်ဗ်ဂျီနီ ပရီဂိုဇင်က ဧပြီလ ၃ ရက်တွင် ပြောကြားခဲ့သည်။

ပရီဂိုဇင်က “အတိအကျပြောရရင် Artyomovsk မြို့ကို ကျွန်တော်တို့အနေနဲ့ ဧပြီလ ၂ ရက်၊ ည ၁၁ နာရီမှာ သိမ်းပိုက်နိုင်ခဲ့ပြီးဖြစ်ပါတယ်။ ဘက်မတ်ရဲ့ မြို့တော်ခန်းမနဲ့ အဓိကကျတဲ့ မြို့လယ်တစ်ခုလုံးကိုသိမ်းပိုက်ပြီး ရုရှားနိုင်ငံ အလံတွေလွှင့်ထူထားပြီးဖြစ်ပါတယ်။ ရန်သူတပ်ဖွဲ့တွေက မြို့အနောက်ပိုင်းအဆောက်အအုံတွေမှာတော့ ကျန်ရှိနေကြသေးတယ်” ဟုပြောခဲ့သည်။

ယူကရိန်းနိုင်ငံ အရှေ့ပိုင်း ဘက်မတ်မြို့အားသိမ်းပိုက်ရန် ၂၀၂၂ ခုနှစ် သြဂုတ်လ ၁ ရက်မှစ၍ ရုရှားတို့က စစ်ဆင်တိုက်ခိုက်ခဲ့ခြင်းဖြစ်ပြီး ရှစ်လကြာတိုက်ပွဲအတွင်း နှစ်ဖက်စလုံးမှ အများအပြား သေကြေထိခိုက်ဒဏ်ရာရခဲ့ကြကြောင်း သိရသည်။

ယူကရိန်းတို့ဘက်ကမူ ၎င်းတို့တပ်ဖွဲ့များက ဘက်မတ်မြို့ကို ဆက်လက်ထိန်းချုပ်ထားဆဲဟု ကြေညာလျက်ရှိသေးကြောင်းလည်း သိရသည်။

Ref—-Tass, France 24