၂၅. ၃. ၂၀၂၃
Written By Thandar
အဆိုတော် စိန်လင်း(Aroma)နဲ့ ဆုပန်ထွာတို့ ဖန်တီးထားတဲ့ “ယောက်ျား ယောက်ျား” သင်္ကြန်သီချင်းလေးရဲ့ Music Video ကို ဒီနေ့ မတ်လ ၂၅ ရက်မှာ ပရိသတ်ဆီ အရောက်ပို့ပေးမယ်လို့ ဆိုပါတယ်။
“ဒီသီချင်းလေးက အရင်က April Queen ခွေထဲမှာပါတဲ့ သီချင်းလေးပါ။ ဒီသီချင်းလေးကို တေးရေး ဆရာစိုးလင်းကလည်း ကျွန်တော်တို့နှစ်ယောက်နဲ့လိုက်တယ်။ ပြန်ဆိုကြည့်ပါလားဆိုပြီးပေးတဲ့အတွက် ဆိုဖြစ်တာပါ။ ကျွန်တော်နဲ့ မပန်က ခင်မင်ခဲ့ကြတာကြာပြီ။ ကျွန်တော်တို့နှစ်ယောက် အမှတ်တရဖြစ်အောင် သီချင်းလုပ်ဖို့ပြောလာတာနဲ့ စီစဉ်ဖြစ်ကြတာ။ လူငယ်ပုံစံသီချင်းလေးလုပ်မယ်။ သင်္ကြန်လည်းနီးနေပြီဆိုတော့ သင်္ကြန်သီချင်းလေးလုပ်ကြမယ်ဆိုပြီးပြောတာနဲ့ ဒီသီချင်းလေး ဆိုဖြစ်ခဲ့ကြတာပါ။ ဒီသီချင်းလေးကို မြူးမြူးကြွကြွလေးဖြစ်အောင် ပြန်လည်ဖန်တီးထားပါတယ်”လို့ အဆိုတော် စိန်လင်း (Aroma) က ပြောပါတယ်။
ဒီသီချင်း Music Video ရိုက်ကူးမှုအနေနဲ့ မဏ္ဍပ်တွေ ကားတွေနဲ့ သင်္ကြန်ခံစားမှုအပြည့်လေးလုပ်ချင်ပေမယ့် ရိုက်ကူးရတဲ့ရက်က အရမ်းကပ်သွားပြီး ရာသီဥတုပူတာတွေကြောင့် Aroma Indoor မှာပဲ သင်္ကြန်အပြင်အဆင်လေးတွေနဲ့ ဆုပန်ထွာရဲ့ သားနဲ့အတူ Aroma မှာ မင်္ဂဆောင်ထားတဲ့ ဇနီးမောင်နှံတွေရဲ့ သားသမီးလေးတွေနဲ့ မြိုင်မြိုင်ဆိုင်ဆိုင် ပျော်ပျော်ရွှင်ရွှင်လေး ရိုက်ကူးထားတယ်လို့ သိရပါတယ်။
“ယောက်ျား ယောက်ျား” သီချင်းလေးကို တေးရေး စိုးလင်းက ရေးသားထားပြီး Music ကို Skybeat က ဖန်တီးပေးထားပါတယ်။ ဒီသီချင်းကို Destino Record Label ကနေပြီး ဖြန့်ချိပေးသွားမယ်လို့ သိရပါတယ်။
