MT News
Written by Min Mahar
နေအိမ်ရှေ့၌ ပန်းအိုးများကို သန့်ရှင်းရေးပြုလုပ်နေသည့် ရာအိမ်မှူးအမျိုးသမီးကြီးအား သေနတ်သမား ၂ ဦးက သေနတ်ဖြင့်ပစ်သ-တ်သွားမှု မန္တလေးတွင် မတ်လ ၂၄ ရက် မွန်းလွဲပိုင်းက ဖြစ်ပွားခဲ့ကြောင်း ဒေသခံများထံမှ သိရသည်။
ဖြစ်စဉ်မှာ မန္တလေးတိုင်းဒေသကြီး၊ ပြည်ကြီးတံခွန်မြို့နယ်၊ သင်ပန်းကုန်းရပ်ကွက်၊ ၁၁၉ လမ်းနှင့် ၁၂၀ လမ်းကြား၊ ၅၇(ဘီ) လမ်း၊ အကွက်အမှတ်၊ ညည-၂၂ အသက် ၅၇ နှစ်အရွယ် ရာအိမ်မှူးအမျိုးသမီးကြီးသည် မတ်လ ၂၄ ရက် မွန်းလွဲ ၁၂ နာရီထိုးခန့်က နေအိမ်ရှေ့ရှိ ပန်းအိုးများအား သန့်ရှင်းရေးပြုလုပ်နေစဥ်အတွင်း ၅၇(ဘီ)လမ်းအတိုင်း တောင်မှမြောက်သို့ မောင်းနှင်လာသော ရုပ်ဆိုးဆိုင်ကယ်အနီရောင်တစ်စီးဖြင့် အမည်မသိအမျိုးသား ၂ ဦးမှ ရောက်ရှိလာကာ သေနတ်အတိုဖြင့် ၂ ချက်ခန့် ပစ်ခတ်သတ်ဖြတ်သွားရာ ယာဘက်လည်ပင်းကို ဖောက်ဝင်ဒဏ်ရာ ၁ ချက်ထိမှန်ခဲ့ပြီး အခင်းဖြစ်နေရာတွင် သေဆုံးသွားသဖြင့် ဒေသခံလူမှုကူညီရေးယာဉ်ဖြင့် မန္တလေးပြည်သူ့ဆေးရုံကြီးသို့ ပို့ဆောင်ခဲ့ကြကြောင်း သိရသည်။
အဆိုပါအခင်းဖြစ်ရာအနီးသို့ သက်ဆိုင်ရာလုံခြုံရေးတပ်ဖွဲ့ဝင်များမှ ရောက်ရှိလာကာ လိုက်လံစုံစမ်းစစ်ဆေးမှုများပြုလုပ်ခဲ့ကြကြောင်းလည်း သိရသည်။
