တရုတ်-မြန်မာ နယ်စပ် မုန်တိန်-ချင်းရွှေဟော်နယ်စပ်၌ ကုန်စည်ပို့ဆောင်မှုများအား တွေ့ရစဉ် (ဓာတ်ပုံ – Chinese Embassy in Myanmar)
၂၄. ၃. ၂၀၂၃
Written by Ye Kyaw
တရုတ်နှင့် မြန်မာ နှစ်နိုင်ငံကုန်စည်စီးဆင်းမှု ပိုမိုကောင်းမွန်စေရန် ယူနန်ပြည်နယ်၊ လင်ချန်းမြို့နှင့် ချင်းရွှေဟော်မြို့တို့အကြား ရထားလမ်းတည်ဆောက်ရန် ယူနန်ပြည်နယ်ရှိ သက်ဆိုင်ရာဝန်ကြီးဌာနသို့ တိုက်တွန်းလျက်ရှိပြီး ၂၀၂၄ ခုနှစ်တွင် စတင်တင်ဆောက်နိုင်မည်ဟု မျှော်မှန်းထားကြောင်း လင်ချန်းမြို့၊ လင်ချန်းမြူနီစပယ် ပြည်သူ့အစိုးရအဖွဲ့ မြို့တော်ဝန် Mr. Du Jianhui က ပြောသည်။
“မြန်မာနိုင်ငံနဲ့ ကုန်စည်စီးဆင်းမှု ပိုမိုကောင်းမွန်စေဖို့အတွက် လင်ချန်းနဲ့ ချင်းရွှေဟော်မြို့တို့အကြား ရထားလမ်းတည်ဆောက်ဖို့ ယူနန်ပြည်နယ်ရှိ သက်ဆိုင်ရာဝန်ကြီးဌာနကို တိုက်တွန်းနေပြီး လာမယ့်နှစ်မှာ စတင်တည်ဆောက်နိုင်မယ်ဟု မျှော်မှန်းထားပါတယ်” ဟု Mr. Du Jianhui က ဆိုသည်။
ထို့ပြင် နယ်စပ်ဂိတ်ပေါက်များတွင် အခြေခံအဆောက်အအုံများ အဆင့်မြှင့်တင်လျက်ရှိပြီး နိုင်ငံတကာ ကုန်သွယ်မှုဇုန် တည်ဆောက်နိုင်ရန် ရည်ရွယ်ထားကြောင်း၊ ချင်းရွှေဟော်နယ်စပ်တွင် Free Trade Zone စတင်ဆောင်ရွက်လျက်ရှိပြီး အခြေခံလိုအပ်ချက်များ ပြီးစီးနေပြီဖြစ်ကြောင်း မြို့တော်ဝန် Mr. Du Jianhui က ပြောကြားသည်။
လင်ချန်းမြို့သည် တရုတ်နိုင်ငံ၊ ယူနန်ပြည်နယ်၏ အနောက်တောင်အရပ်တွင်တည်ရှိပြီး ဧရိယာအားဖြင့် ၂ ဒသမ ၄ သိန်း ကီလိုမီတာ ကျယ်ဝန်းကာ ယခင်နှစ် GDP မှာ တရုတ်ယွမ်ငွေ သိန်းတစ်သောင်းရှိပြီး ယူနန်ပြည်နယ်၏ ဖွံ့ဖြိုးတိုးတက်မှုတွင် နံပါတ်ရှစ်နေရာတွင်ရှိသော မြို့လည်းဖြစ်သည်။
တရုတ်နိုင်ငံနှင့် မြန်မာနိုင်ငံတို့သည် ရှည်လျားသည့် နယ်နိမိတ်ခြင်း ထိစပ်မှုရှိပြီး ရှေးယခင်ကတည်းက နီးကပ်သည့် ကူးလူးဆက်ဆံမှုများ ရှိသည့်အပြင် လက်ရှိတွင် ကုန်သွယ်မှုချော့မွေ့စေရေးနှင့် ငွေပေးချေမှု ဘဏ်စနစ်ပေါ်မှ ယွမ်/ကျပ် တိုက်ရိုက်ပေးချေမှုတို့မှာ အဆင်ပြေပြေ ဆောင်ရွက်နိုင်ရေးကို အသင်းချုပ်ဘက်မှ တတ်နိုင်သမျှ ကူညီပေးသွားမည်ဖြစ်ကြောင်း UMFCCI ဥက္ကဋ္ဌ ဦးအေးဝင်းက ပြောသည်။
