၁၁.၃. ၂၀၂၃
Written By Thandar
မီးမီးမွှေး ထုတ်လုပ်ရေးက ရိုက်ကူးထုတ်လုပ်မဲ့ Suspense Drama ဇာတ်လမ်း “ကျွန်မခင်ပွန်း၏လျှို့၀ှက်ချက်” ဇာတ်လမ်းတွဲ ကန်တော့ပွဲပေးအခမ်းအနားကို မတ်လ ၁၁ ရက် နံနက် ၇ နာရီက ရန်ကုန်မြို့ သင်္ဃန်းကျွန်းမြို့နယ် ကျိုက္ကဆံဘုရားမှာ ကျင်းပခဲ့ပါတယ်။
အပိုင်း ၁၀ ပိုင်းပါဝင်မယ့် ဒီဇာတ်လမ်းတွဲကို မတ်လနောက်ဆုံးပတ်မှာ ရန်ကုန်မြို့ဝန်းကျင်မှာ ရိုက်ကူးပုံဖော်သွားမှာပါ။ ဒီဇာတ်လမ်းတွဲ စာရေးဆရာလူနေရဲ့ ပထမဦးဆုံးဒါရိုက်တာအဖြစ်နဲ့ မြင်တွေ့ရမယ့် ဇာတ်ကားလည်းဖြစ်ပါတယ်။
“ဒီဇာတ်ကားလေးက အိမ်ထောင်ရေး Suspense Drama ကိုမှ Drama ဇာတ်လေးပိုများပါတယ်။ လွမ်းစရာလေးတွေများမယ်။ ဇာတ်လမ်းမှာပါဝင်မယ့် သရုပ်ဆောင်တွေကလည်း အသစ်တွေများတော့ ပရိသတ်တွေအတွက် အသစ်အဆန်းတွေ ဖြစ်မယ်။ ဇာတ်ကားနဲ့ ပတ်သက်ပြီး သေချာလေး Pre-Production ပိုင်းကအစ အိုက်တင်ပိုင်းကအစ ကြိုတင်ပြင်ဆင်ထားတဲ့ အပိုင်းတွေ ရှိပါတယ်။ကျွန်တော်က အရင်က လူနေဆိုပြီး စာအုပ်တွေပဲ ရေးတဲ့အခါကျတော့ ဒီကားလေးက ကျွန်တော့်ရဲ့ ပထမဆုံး ဒါရိုက်တာအနေနဲ့ ရိုက်ကူးထားတဲ့ ကားလေးဖြစ်တဲ့အတွက် စိန်ခေါ်မှုအသစ်တော့ ဖြစ်တယ်”လို့ ဒါရိုက်တာ လူနေက ပြောပါတယ်။
ဒီဇာတ်ကားရဲ့ ဇာတ်လမ်း၊ ဇာတ်ညွှန်းကို Lunay & Mo တို့ကရေးသားပြီး ဒါရိုက်တာလူနေက သရုပ်ဆောင်တွေဖြစ်တဲ့ နော်ဖောအယ်ထား၊ ချမ်းမင်းရဲထွဋ်၊ နေရှိင်း၊ ဆုလာဘ်ရတနာ၊ ဟန်သက်ဇော်၊ ခွန်ဘုန်း၊ ဇွဲဇင်၊ နှင်းဝတ်ရည်ကျော်၊ ဆုမြတ်နိုး၊ ထူးဝင့်သန္တာ၊ ခင်ပြည့်ပြည့်ဝင့်နိုင်၊ ကေကေ၊ ကလေးသရုပ်ဆောင် ရှင်မင်းအိမ် စတဲ့ အနုပညာရှင်ပေါင်းများစွာနဲ့ ရိုက်ကူးသွားမှာ ဖြစ်ပါတယ်။
