၂. ၃. ၂၀၂၃
Written by Peya
လှည်းကူးမြို့နယ်တွင် ယာဉ်တိုက်မှု ဖြစ်ပွားခဲ့ပြီး ကားပေါ်ပါသူ ၃ ဦး ဒဏ်ရာရသည့် အနက် အမျိုးသား ၁ ဦး ခြေထောက်ကျိုးခဲ့ကြောင်း ကရုဏာရှင်အသင်း-လှည်းကူးမြို့ထံက သိရသည်။
ဖြစ်စဉ်မှာ လှည်းကူးမြို့နယ်၊ အမှတ် ၃ လမ်းဆုံအနီးတွင် မတ်လ ၂ ရက် နံနက် ၇ နာရီ အချိန်က ဖြစ်ပွားခဲ့ခြင်း ဖြစ်ကာ ကျန် အမျိုးသား ၁ ဦးနှင့် အမျိုးသမီး ၁ ဦးတွင် ပွန်းပဲ့ဒဏ်ရာများ ရခဲ့ကြောင်းလည်း သိရသည်။
“အဲ့ဒီ ကားက စက်ရုံ ဖယ်ရီကားပါ။ ကားတိုက်ပြီးတော့မှ ကျွန်တော်တို့ကို လူနာ လာတင်ဖို့ ခေါ်တာပါ။ လူနာက ၃ ယောက်ပါ။ လူနာတွေက စက်ရုံ အလုပ်သမားတွေပါ။ ရပ်ထားတဲ့ ကားပေါ်ကနေ လူနာတွေကို တင်လာတာပါ။ ဖြစ်စဉ်ကိုတော့ ကျွန်တော်တို့ မသိရပါဘူး” ဟု ကရုဏာရှင်အသင်း-လှည်းကူးမြို့မှ တာဝန်ရှိသူတစ်ဦးက ဆိုသည်။
